FRÉTTIR
Sumarleyfi hjá Lyfjaauðkenni
08.07.2020
Skrifstofa Lyfjaauðkennis verður lokuð frá 12.júlí til 4.ágúst vegna sumarleyfa.
Fyrir áríðandi erindi, vinsamlegast sendið textaskilaboð á símanúmer félagsins, 660 3707 eða sendið tölvupóst.
Vöktun viðvarana heldur áfram þó skrifstofan loki tímabundið.
Fyrirspurnir vegna viðvarana
T-póstur: alerts@lyfjaaudkenni.is
Aðrar fyrirspurnir og spurningar tæknilegs eðlis
T-póstur: info@lyfjaaudkenni.is
Heimasíða: https://lyfjaaudkenni.is/
Uppfærsla á lyfjaauðkenniskerfinu – R6.2.
30.04.2020
Næstu uppfærslu á lyfjaauðkenniskerfinu (NBS R6.2) verður ýtt úr vör þriðjudaginn 5.maí kl. 22. Ekki verður hægt að ná sambandi við kerfið í þrjár til fjórar klst. meðan á uppfærslunni stendur.
Með breytingunni verða fleiri skýrslur gerðar aðgengilegar úr lyfjaauðkenniskerfinu fyrir lyfjastofnanir í Evrópu.
Að auki verður tækifærið notað til að framkvæma nokkrar minniháttar lagfæringar á kerfinu (bug-fixes) og þá verður jafnframt hætt stuðningi við úrelta öryggis-staðla (MS TLS 1.0 og TLS 1.1).
Kerfið styður eftir sem áður TLS 1.2, auk annarra nýrri staðla.
Aðalfundur Lyfjaauðkennis ehf. 2020
Aðalfundur Lyfjaauðkennis ehf. var haldinn föstudaginn 27. mars kl. 16. Fundurinn var haldinn með rafrænum hætti að þessu sinni, en á dagskrá voru hefðbundin aðalfundarstörf. Ný stjórn félagsins var kjörin á aðalfundinum til eins árs. Stjórninn er skipuð fjórum fulltrúum hluthafa og þar skal a.m.k. vera einn fulltrúi framleiðenda frumlyfja, einn fulltrúi samheitalyfja og einn fulltrúi samhliðainnflytjenda. Fulltrúar félagsmanna í stjórn (lyfjaheildsalar sameiginlega, lyfsalar sameiginlega og heilbrigðisstofnana sameiginlega) eru samtals þrír. Varamenn í stjórn eru valdir með sama hætti.
Stjórn Lyfjaauðkenni er nú skipuð eftirfarandi einstaklingum:
Aðalmenn f.h. hluthafa: Elísabet Tómasdóttir, Guðmundur Óskarsson, Unnur Björgvinsdóttir, Guðlaug Ingvarsdóttir. Aðalmenn f.h. félagsmanna: Sigurður Traustason, Hálfdan G. Gunnarsson og Hákon Steinsson. Varamenn f.h. hluthafa: Regína Hallgrímsdóttir, Jón Óskar Hinriksson, Sigrún Edwald, Yrsa Örk Þorsteinsdóttir. Varamenn f.h. félagsmanna: Þórbergur Egilsson, Ólafur Adolfsson og Arnþrúður Jónsdóttir. Guðmundur Óskarsson var endurkjörinn formaður stjórnar félagsins.
Á fundinum þakkaði formaður félagsins fráfarandi stjórnarmönnum, þeim Bessa Gíslasyni, Gylfa Rútssyni, Gunni Helgadóttur og Þórdísi Ólafsdóttur fyrir þeirra ómetanlega framlag við að koma íslenska lyfjaauðkenniskerfinu á fót. Skýrslu formanns í heild sinni má finna hér.
Mælaborð lyfjaauðkenniskerfisins
03.02.2020
Notendum lyfjaauðkenniskerfisins gefst nú aðgangur að mælaborði sem veitir yfirlit yfir starfsemi kerfisins á Íslandi og ellefu öðrum löndum sem nota kerfi frá Solidsoft Reply. Mælaborðið vaktar með sjálfvirkum hætti þrettán mismunandi aðgerðir í lyfjaauðkenniskerfinu og sýnir niðurstöður tveggja síðustu aðgerða í vöktuninni.
Grænn litur hjá viðkomandi landi gefur til kynna að báðar aðgerðirnar hafi heppnast og að viðkomandi landskerfið starfi eðlilega. Gulur litur sýnir að önnur tveggja síðustu aðgerða hafi misheppnast og liturinn verður rauður ef hnökrar voru við framkvæmd beggja síðustu aðgerða.
Upplýsingarnar yfir starfsemi kerfisins í viðkomandi landi eru birtar á opnu vefsvæði (https://status.nmvo.eu/).
Lyfjaauðkenni vonast til að þessi nýjung veiti notendum gagnlega yfirsýn yfir virkni lyfjaauðkenniskerfisins.
Að tengjast lyfjaauðkenniskerfinu
16-01-2020
Lyfjaauðkenni vekur athygli á þeirri skyldu aðila sem hafa leyfi til að afhenda almenningi lyf, að sannreyna öryggisþætti lyfjapakkningar fyrir afhendingu. Öryggisþættirnir eru annars vegar órofið innsigli og hins vegar að upplýsingar í tvívíðu strikamerki pakkningarinnar séu í samræmi við gögn sem framleiðandi lyfsins skráir inn í gagnagrunn lyfjaauðkenniskerfisins.
Notandinn skannar tvívíða strikamerkið og fær til baka staðfestingu frá lyfjaauðkenniskerfinu þess efnis að óhætt sé að afhenda lyfið. Sendi kerfið frá sér viðvörun, þarf að vera til staðar verklag fyrir meðhöndlun á slíku fráviki hjá notanda – sjá nánari upplýsingar á heimasíðu Lyfjaauðkennis (https://lyfjaaudkenni.is/spurningar-svor/).
Lyfjaauðkenni veitir notanda aðgang að lyfjaauðkenniskerfinu honum að kostnaðarlausu. Til að tengjast lyfjaauðkenniskerfinu þarf notandinn annað hvort sérsniðna lausn sem notar lyfjaafgreiðslu- og birgðahugbúnað sem er til staðar hjá notanda, eða hugbúnaðarlausn sem er algerlega óháð öðrum hugbúnaði notanda, svo kallað „stand-alone“ kerfi. Hið eina sem slíkar tengilausnir þarfnast er tenging við internetið og notkun á viðurkenndum netvafra s.s. MS Explorer, Chrome eða Firefox.
Sem dæmi um slíkar tengilausnir í áskriftarþjónustu eru medAspis, NMVS-Connect, Optel Group, Quick Pharm Solutions og Solidsoft Reply (VeriLite®). Þessir aðilar innheimta mánaðarlegt áskriftargjald fyrir þjónustuna sem getur hlaupið frá kr. 1.400 til kr.4.500 – eða meira, allt eftir umfangi notkunar.
Nánari upplýsingar hjá Lyfjaauðkenni (info@lyfjaaudkenni.is).
Lyfjaauðkenniskerfið – Uppfærsla 12.desember
12.12.2019
Í kvöld, 12. desember, verður framkvæmd uppfærsla R.6.1.1 á lyfjaauðkenniskerfinu.
Tilgangur uppfærslunnar er fyrst og fremst að efla og bæta upplýsingagjöf til lyfjastofnana í Evrópu.
Uppfærslan hefur engin áhrif á kerfi eða viðmót hjá öðrum notendum lyfjaauðkenniskerfisins.
Uppfærslan fer fram á tímabilinu milli kl. 21:00 og 01:00 og á þessum tíma verður lyfjaauðkenniskerfið óaðgengilegt.